Deputat Göyçay və Ağdaş rayonlarında şəhid ailələrini ziyarət etdi


Yanvar ayının 16-da 89 saylı Göyçay-Ağdaş Seçki Dairəsi üzrə Milli Məclisin deputatı Məzahir Əfəndiyev Göyçay və Ağdaş rayonları ərazilərində İkinci Qarabağ müharibəsində  şəhid olan övladlarımızın ailələrini ziyarət edib.
Deputat ilk öncə  Göyçay şəhər  Şəhidlər Xiyabanını ziyarət edib, Azərbaycanın suverenliyi uğrunda canından keçən şəhidlərimizin məzarlarına gül dəstələri qoyaraq ruhlarını dərin ehtiramla yad edib, onlara Allahdan rəhmət diləyib. 
Millət vəkili 20-yə yaxın şəhid ailəsi ilə görüşüb, onlara başsağlığı verib, Cənab Prezident İlham Əliyevin  və Birinci vitse-prezident Mehriban xanım Əliyevanın şəhid ailələrinə və qazilərə göstərdikləri yüksək diqqət və qayğı haqqında, yeni yaranmış “YAŞAT” Fondu, bu istiqamətdə icra edilən dövlət proqramları barəsində fikir mübadiləsi apararaq ətraflı məlumat verib və bildirib ki, şəhid ailələri və qazilərimiz hər zaman dövlətin qayğısı ilə əhatə olunub, bundan sonra da olunacaqlar.
M. Əfəndiyev qeyd edib ki, Qarabağımız Ali Baş Komandanın rəhbərliyi altında şəhidlərimizin qanı-canı bahasına azad olunub. Şəhidlik zirvəsinə yüksələn qəhrəmanlarımızın tarix yazan adları Azərbaycan xalqının qəlbində əbədi yaşayacaq, şəhidlərimiz qürur mənbəyi olaraq daim yaddaşlara həkk olunacaqlar və şəhid ailələrimizə dəstək olmaq hər bir azərbaycanlının mənəvi borcudur.
O, xüsusilə vurğulayıb ki, şəhidlərimiz müqəddəs bayrağımızı azad edilmiş şəhər və kəndlərimizdə dalğalandıraraq, başda Ali Baş Komandanımız olmaqla Silahlı Qüvvələrimizin qüdrətini, xalqımızın birliyini dünyaya göstərmişlər. “Şanlı Ordumuz əcdadımızdan gələn hərb ənənələrini texnoloji yeniliklərin tətbiqi ilə zənginləşdirərək, Ermənistanın 30 ilə yaxın formalaşdırmağa çalışdığı saxta mifləri 44 gün içində darmadağın etdi. Quruculuq, yaradıcılıq, xalqın rifahının yaxşılaşması Prezident İlham Əliyevin rəhbərliyi ilə dövlətin prioritetidir və əminəm ki, Cənab Prezidentin də qeyd etdiyi kimi, Qarabağ dünyanın ən inkişaf etmiş regionlarından birinə çevriləcək. Ali Baş Komandanın əmri ilə mübariz Azərbaycan Ordusunun daha da təkmilləşməsi, işğaldan azad olunan torpaqlarımıza qayıdış, şəhid və qazi ailələrinə dövlətin xüsusi nəzarəti bundan sonra da davam edəcək.” 
Bir daha şəhidlərimizə Allahdan rəhmət, yaxınlarına səbr diləyirik. Müalicəsi davam edən qazilərimizə isə tezliklə sağalmaqlarını arzu edirik.